Është publikuar në Fletoren Zyrtare Vendimi nr. 822, datë 28.10.2026, i Këshillit të Ministrave, i cili parashikon disa ndryshime në Vendimin nr. 953, datë 29.12.2014, “Për dispozitat zbatuese të ligjit nr. 92/2014, ‘Për tatimin mbi vlerën e shtuar në Republikën e Shqipërisë’:
- Ulja e pragut minimal të regjistrimit në TVSH.
Pragu minimal i regjistrimit të detyrueshëm në TVSH ulet nga 10 milionë lekë në 5 milionë lekë qarkullim vjetor.
Rëndësia për Bizneset :
Bizneset që realizojnë qarkullim vjetor nga 5 deri në 10 milionë lekë do të përfshihen në skemën e regjistrimit të detyrueshëm në TVSH. Si rrjedhojë, ato do të duhet të përshtatin sistemet e faturimit, të deklarojnë TVSH-në dhe të përmbushin detyrimet përkatëse administrative dhe tatimore.
- Ndryshimi i referencave për normën e TVSH-së në qiradhënien dhe furnizimin e ndërtesave.
Hiqen referencat konkrete ndaj normës 20% të TVSH-së nga dispozitat që rregullojnë të drejtën për të zgjedhur aplikimin e TVSH-së për qiradhënien e ndërtesave, furnizimin e ndërtesave ose të pjesëve të tyre, si dhe procedurat për ushtrimin e kësaj të drejte.
Rëndësia për bizneset:
Subjektet që kryejnë veprimtari të qiradhënies ose furnizimit të ndërtesave, në rastet kur zgjedhin aplikimin e TVSH-së, do të duhet t’i referohen normës së përcaktuar në ligjin për TVSH-në në fuqi, pa u mbështetur më në referencën fikse prej 20% të parashikuar në dispozitat zbatuese.
- Ndryshimi i referencave për normën e TVSH-së për shërbimet e akomodimit.
Për shërbimet e akomodimit në strukturat akomoduese, vendimi përcakton se norma e reduktuar e TVSH-së do të jetë ajo e parashikuar në nenin 49 të ligjit për TVSH-në. Për këtë qëllim, hiqen nga dispozitat zbatuese referencat konkrete ndaj normave 6% dhe 20%.
Rëndësia për bizneset:
Hotelet dhe strukturat e tjera akomoduese duhet të zbatojnë normën e TVSH-së të përcaktuar në nenin 49 të ligjit për TVSH-në, sipas kategorisë përkatëse të shërbimit. Për rrjedhojë, subjektet duhet të marrin në konsideratë ndryshimet ligjore që do të jenë në fuqi nga 1 janari 2027 dhe të përshtatin faturimin e tyre në përputhje me to.
- PROPOZIME TË TJERA PËR NDRYSHIME NË TVSH NË PROCES KONSULTIMI.
Përveç ndryshimeve të miratuara me Vendimin nr. 822, vijojnë të jenë në proces konsultimi edhe propozimet për:
– Rritjen e normës standarde të TVSH-së nga 20% në 21%.
– Aplikimin e normës 6% për 54 produkte bazë ushqimore.
– Rritjen e TVSH-së për shërbimet e akomodimit turistik nga 6% në 10%, me përjashtim të agroturizmit.
Këto ndryshime nuk janë miratuar ende përfundimisht dhe mund të pësojnë ndryshime gjatë procesit të shqyrtimit legjislativ.
Hyrja në fuqi: Vendimi eshte botuar ne fletoren zyrtere me date 29.10.2026 dhe i shtrin efektet nga data 1 janar 2027.
