Akti normativ për disa ndryshime në ligjin për tatimin mbi të ardhurat
Këshilli i Ministrave ka miratuar aktin normativ nr. 2, datë 7.6.2023, “Për disa shtesa në ligjin nr. 29/2023, “Për tatimin mbi të ardhurat”, i cili synon zbusë kostot financiare ndaj eksportuesve të mallrave në regjimin e përpunimit aktiv, të prekur nga rënia e kursit të këmbimit të valutave të huaja (kryesisht euros). Ky akt normativ është publikuar në Fletoren Zyrtare nr. 92, datë 23.06.2023.
Akti normativ parashikon se subjektet eksportuese të mallrave në regjimin e përpunimit aktiv, të cilët gjatë vitit 2022 kanë eksportuar jo më pak se 70% të vlerës së përgjithshme të shitjeve (përfshirë eksportet), do të paguajnë tatimin mbi fitimin për vitin 2023 deri me datë 31 mars 2024, por nuk do të paguajnë këstet e parapagimeve të periudhës 30 qershor, 30 shtator apo 31 dhjetor të vitit 2023.
Shpjegim: Ligji nr. 8438, datë 28.12.1998, “Për tatimin mbi të ardhurat” parashikon se bilanci kontabël dhe anekset e tij, së bashku me të dhënat e tjera shoqëruese, dorëzohen brenda datës 31 mars të vitit pasardhës. Gjatë periudhës vijuese tatimore, tatimpaguesi parapaguan këstet tremujore të tatimit mbi fitim brenda datës (a) 30 mars, për muajt janar, shkurt, mars; (b) 30 shtator, për muajt korrik, gusht dhe shtator, dhe, (c) 30 dhjetor, për muajt tetor, nëntor dhe dhjetor.
**Ligji nr. 29/2023 fillon efektet e tij nga data 1 janar 2024 (me përjashtim të nenit 69 (1) (ç) dhe 69 (2), të cilët i kanë filluar efektet me datë 1 qershor 2023) dhe deri në datën e fillimit të efekteve të këtij ligji, zbatohen parashikimet e ligjit nr. 8438, datë 28.12.1998, “Për tatimin mbi të ardhurat”, të ndryshuar.
Neni 69 (1) (ç) i ligjit nr. 29/2023, “Për tatimin mbi të ardhurat” përcakton se personat juridikë, të regjistruar përpara hyrjes në fuqi të këtij ligji, të cilët ushtrojnë veprimtari ekonomike për prodhimin apo zhvillimin e software-ve, do t’i nënshtrohen tatimit mbi fitim me normë 5% deri më 31 dhjetor 2025.
Ndërsa, neni 69 (2) parashikon se tatimi mbi të ardhurat personale nga punësimi, për periudhën 1 qershor 2023 – 31 dhjetor 2023 është si më poshtë vijon:
| E ardhura nga paga në lekë/muaj | E ardhura e tatueshme në lekë/muaj | Norma tatimore në përqindje/muaj | ||
| Nga | Deri në | Nga | Deri në | |
| 0 | 50 000 | 0 | 50 000 | 0% |
| 50 001 | 60 000 | 0 | 35 000 | 0% |
| 35 001 | 60 000 | 13% të shumës mbi 35 000 | ||
| lekë | ||||
| 60 001 | Më | 0 | 30 000 | 0% |
| tepër | 30 001 | 200 000 | 13% e shumës mbi 30 000 | |
| 200 001 | Më | lekë | ||
| tepër | 22 100 lekë + 23% e | |||
| shumës mbi 200 000 lekë | ||||
Projektligji për disa ndryshime në ligjin për sigurimet shoqërore
Në Kuvendin e Shqipërisë është depozituar projektligji “Për disa shtesa dhe ndryshime në ligjin nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar. Ndryshimet kryesore që sjell ky projektligj janë si më poshtë vijon:
- Personave me profesion në fushën e teknologjisë së informacionit, të punësuar në subjektet me aktivitet kryesor në fushën e teknologjisë së informacionit, të cilët ushtrojnë aktivitetin e tyre sipas ligjit nr.58/2022, “Për krijimin, organizimin dhe funksionimin e parqeve teknologjike dhe shkencore”, u paguhen kontributet e sigurimeve shoqërore në nivelin e pagës minimale mujore në shkallë vendi (me miratim paraprak të tyre), pavarësisht pagës bruto të deklaruar.
- Përfituesit e pensionit të pleqërisë, të cilët vetëpunësohen si të vetëm në sektorin privat përjashtohen nga detyrimi për të paguar kontributet e detyrueshme të sigurimeve shoqërore.
- Përfituesit e pensionit të pleqërisë, të punësuar ose të vetëpunësuar në sektorin privat tërheqin këstet e pensionit gjatë periudhës së punësimit/vetëpunësimit. Kjo periudhë punësimi/vetëpunësimi në sektorin privat nuk u njihet si periudhë sigurimi, për efekt pensioni.
- Bankat, me marrjen e vendimit nga Instituti i Sigurimeve Shoqërore, bllokojnë llogarinë bankare të pensionistit dhe kthejnë në llogarinë e fondit të sigurimeve shoqërore këstet e pensionit që u përkasin periudhave pasi pensionisti ka ndërruar jetë dhe i janë kredituar padrejtësisht në llogari, për shkak të mos çregjistrimit nga Regjistri i Gjendjes Civile.
- Kërkesat në lidhje me përfitimet sipas ligjit depozitohen në portalin qeveritar e-albania, ndërsa dokumentet origjinale ose të njësuara dërgohen me postë.
Projektligji për disa ndryshime në ligjin për sistemin e taksave vendore
Në Kuvendin e Shqipërisë është depozituar projektligji “Për një ndryshim dhe disa shtesa në ligjin nr. 9632, datë 30.10.2006, “Për sistemin e taksave vendore”, i ndryshuar. Projektligji synon të propozojë një lehtësi të re fiskale për sa i përket taksës së ndikimit në infrastrukturë, për strukturat që destinohen për përdorim në sektorin bujqësor e blegtoral.
Sipas ndryshimeve të propozuara, taksa e ndikimit në infrastrukturë për ndërtimin e strukturave që destinohen për përdorim në
sektorin bujqësor dhe blegtoral është jo më shumë se 1% e vlerës së investimit, ndërsa për Bashkinë e Tiranës është jo më shumë se 2% e saj.
Gjithashtu, taksa si më sipër përcaktuar aplikohet edhe për subjektet që janë në proces aplikimi për t’u pajisur me leje ndërtimi për ndërtimin e strukturave që destinohen për përdorim në sektorin bujqësor dhe blegtoral.
