Për t’ju informuar me ndryshimet më të fundit në legjislacionin ligjor dhe financiar, ky mini- alarm tatimor i përgatitur nga “A.R.S Legal & Financial Services” , ju ofron informata të vlefshme mbi publikimet më të fundit të legjislacionit shqiptar.
Në Fletoren Zyrtare Nr. 178, datë. 09.10.2020 është botuar Akti Normativ Nr. 31, datë 07.10.2020 ” Për faljen e masave administrative, me karakter ndëshkues, të vendosura gjatë periudhës së infeksionit të shkaktuar nga covid-19 dhe familjeve të dëmtuara nga fatkeqësitë natyrore”, akt i cili ka hyrë në fuqi menjëherë me publikimin e tij në Qendrën e Botimeve Zyrtare.
Ky akt normativ parashikon:
- faljen e të gjitha masave administrative me karakter ndëshkues, të vendosura nga autoritetet shtetërore përkatëse, për shkeljen e rregullave apo të akteve ligjore e nënligjore të nxjerra në kuadër të masave të ndërmarra për parandalimin dhe luftimin e infeksionit të shkaktuar nga COVID-19, nga data 17.4.2020 deri në datën 7.10.2020; dhe
- faljen e të gjitha masave administrative të vendosura nga strukturat e njësive të vetëqeverisjes vendore ndaj familjeve të dëmtuara nga fatkeqësitë natyrore, tërmetet e datave 21 shtator dhe 26 nëntor 2019, për shkeljet e konstatuara gjatë kryerjes së punimeve për riparimin/rindërtimin e banesave individuale.
Për mënyrën, rregullat e hollësishme për zbatimin e faljes, kthimin e shumave të paguara dhe leje/licensave/mjeteve ngarkohen institucionet shtetërore dhe njësitë e vetëqeverisjes vendore.
