Është publikuar në Fletoren Zyrtare VKM nr. 796, datë 21.10.2026, “Për disa shtesa dhe ndryshime në VKM nr. 391, datë 3.5.2017”, për përcaktimin e procedurave të regjistrimit dhe publikimit në Qendrën Kombëtare të Biznesit (QKB).
Risia kryesore lidhet me detyrimin e subjekteve të reja dhe ekzistuese për verifikimin dhe certifikimin e kodeve NVE (Nomenklatura e Veprimtarive Ekonomike) nga Dhoma Ekonomike Kombëtare (DHEK), e cila pritet të krijohet.
Për subjektet e reja pas hyrjes në fuqi: Aktiviteti deklarohet sipas klasifikimit NVE dhe kodi certifikohet nga Dhoma Ekonomike Kombëtare (DHEK). Certifikata duhet të depozitohet nëpërmjet portalit e-Albania brenda 30 ditëve kalendarike nga regjistrimi. Mosdepozitimi brenda afatit sjell pezullimin automatik të statusit të subjektit deri në përmbushjen e këtij detyrimi. Pas certifikimit, subjektet janë të detyruara të kryejnë rinovimin periodik të certifikatës NVE pranë DHEK-së.
Për subjektet ekzistuese në momentin e hyrjes në fuqi të detyrimit: Subjektet që nuk disponojnë certifikatën NVE të lëshuar nga DHEK-ja duhet të pajisen me të dhe ta depozitojnë elektronikisht brenda një viti nga momenti kur detyrimi bëhet efektiv, pas plotësimit të kushteve teknike dhe të ndërveprimit ndërinstitucional. Mosrespektimi i afatit sjell pezullimin e statusit deri në depozitimin e certifikatës. Subjektet gjithashtu detyrohen ta rinovojnë certifikatën NVE periodikisht ose të pajisen me një certifikatë të re në rast se ndryshojnë objektin e aktivitetit.
Detyrime të tjera: VKM-ja parashikon gjithashtu verifikimin fizik të identitetit të aplikantit me iniciativën e QKB-së, regjistrimin e adresës së plotë dhe të koordinatave GPS, ndryshime në metodologjinë e depozitimit të pasqyrave financiare, si dhe shkëmbimin e të dhënave përmes sistemeve BRIS/EUID pas anëtarësimit të Shqipërisë në Bashkimin Evropian.
Ndryshimet hyjnë në fuqi më 1 janar 2027. Megjithatë, zbatimi mund të varet nga miratimi i projektligjit për krijimin e Dhomës Ekonomike Kombëtare, i cili ende është në shqyrtim.
